Во текот на изминатото деноноќие на територијата на државава на 651 лице им се издадени решенија за изолација, а 346 лица потпишале изјави за самоизолација.
Од страна на полициски службеници, соопшти денеска МВР, извршени се контроли кај лица во изолација и самоизолација, при што три лица кои не ја почитувале мерката за изолација и самоизолација, ќе бидат спроведени во државен карантин на сопствен трошок, а ќе им бидат поднесени и кривични пријави по член 206 од Кривичниот законик на РСМ.
По однос на мерката за неносење лична заштита на лице регистрирани се 618 прекршоци.
Министерот за внатрешни работи Наќе Чулев соопшти дека во државен карантин се спроведени вкупно 170 лица.
– Полициските службеници се во првите редови во справување со пандемијата на COVID-19 и тие во континуитет преземаат мерки за контрола на почитување на одлуките на Владата. Во таа насока, од страна на полициските службеници досега констатирани се вкупно 20327 прекршоци за неносење лична заштита на лицето од кои 618 прекршоци во изминатото деноноќие, напиша на својот Facebook профил Чулев.
Тој посочува дека во координација со Државниот пазарен инспекторат во текот на изминатото деноноќи извршени се 187 контроли во објекти при што не се евидентирани објекти кои не ги почитувале одлуките на владата.
Чулев, исто така, апелира до сите граѓани да ги почитуваат мерките за заштита од коронавирусот и сите заеднички да придонесеме што побрзо животот да биде вратен во нормала.