Кошаркарскиот клуб од скопската населба Аеродром се жали на гусниот распоред поради кој голем број на кошаркари се здобија со повреди.
„Настапот во Купот на Македонија на секојдневно ниво и потоа играње три меча од четвртфиналето во пет дена без позначаен одмор, односно вкупно шест натпревари во осум дена дефинитивно може да се протолкува како нехуман третман по здравјето на кошаркарите и пеколен ритам каков што нема ниту во НБА“, вели клубот во соопштение објавено на официјалната клупска веб-страница.
„Ова не е проблем само на нашиот клуб, туку и на останатите елитни тимови кои ќе ја продолжат битката за титулата, а чии играчи исто така се подложни на пеколен период, кој сигурно може да им ја загрози дури и нивната кариера. Данокот на наметнатиот нехуман ритам полека почнува да се плаќа, па на нашиот последен меч против Куманово дури тројца кошаркари (по)сериозно се повредија. На Бојан Крстевски му настрада коленото, на Дамјан Стојановски мускулот на ногата, а на Иван Карачиќ задната ложа. Повредите на тројцата не се идентични, ама имаат заеднички содржател – преголемиот замор, оценет од лекарските стручњаци кои ги прегледуваа, а на кои не им се веруваше низ какви напори биле приморани да минат во изминативе денови“, се додава во соопштението.
Проблемот со повредите во редовите на МЗТ може да се одрази и врз репрезентацијата бидејќи овој прволигаш дава доста репрезентативци,.
„Бараме КФМ барем малку да ги заштити играчите, првенствено од човечки принципи, но и од интерес за македонската кошарка, бидејќи речиси сите останати домашни играчи се актуелни или потенцијални репрезентативци. Секоја нивна, евентуална односно не дај боже повреда, ќе биде проблематична за настапот на Македонија во претквалификациите за СП 2023, кои се играат веќе во август. Војдан Стојановски сигурно ќе го немаме, а зарем треба да останеме без уште некој носител, само поради желбата да се заврши некој ден порано, а што носи опасно доигрување на плеј-офот преку средби во секој втор ден“.
Од клубот бараат КФМ да направи измени на календарот за доигрување на плеј-офот и да го врати претходниот систем на играње два натпревара неделно, односно среда-сабота. „Со тоа би се намалил нехуманиот ритам за играчите, што секако ќе го намали ризикот од повреди, а дефинитивно ќе го крене квалитетот на натпреварите“.
