Стапката на позитивност на грчките острови Миконос и Милос во изминатата седмица надмина 50%, а во цела Грција е над 12%, јави дописничката на МИА од Атина.
Според официјалните податоци од Националната организација за јавно здравје на Грција, за стапката на позитивност во периодот од 20 до 26 јуни 2022 година, на Миконос 53,53% од направените тестови биле позитивни, на Милос 52,45%, а на Санторини 39,51%.
Според стапката на позитивност, следат островите Итаки, Парос, Карпатос, Крф, Кос и источниот дел на областа Атика, поширокиот регион на Атина со над 20%.
Во конкретниот период од седум дена стапката на позитивност во Грција е 12,7%, од вкупно 715.666 лабораториски тестови (ПЦР и рапид).
Националната организација за јавно здравје на Грција секоја среда заедно со дневните податоци за новозаразени, починати и хоспитализирани, ја објавува и стапката на позитивност на седумдневно ниво.
Од почетокот на пандемијата во земјата се потврдени 3.661.004 случаи на COVID-19, се проценува дека има 168.440 реинфекции што е 4,4% од вкупниот број на позитивни резултати, а починаа вкупно 30.218 лица.
