Најбрзиот нокаут во бокс со голи раце

Боксот со голи раце е се попопуларна боречка вештина во последниве години, а BKFC како организација рапидно расте.

Настанот BKFC 69 се одржа синоќа, а на него беше испишана историја бидејќи го забележа најбрзиот нокаут досега во спортот.

Џастин Вотсон го нокаутира Кол Ферел за само 2,9 секунди! Основачот и претседател на BKFC Дејвид Фелдман потврди дека тоа е најбрзиот нокаут досега.

„Неверојатно“, рече тој и покажа стоперка со времетраењето на тепачката. Часовникот покажа 2,90 секунди.

Претходниот рекорд беше три секунди, а го држеше Улисес Дијаз, кој го нокаутира Донелеј Бенедето пред четири години.

Во боксот со голи раце, борбите траат пет рунди од две минути, а боксерите имаат само завои на тупаниците, без ракавици. Затоа, расекотини и повреди се многу чести, поради што често се прекинуваат борбите, кои поради тоа ретко доаѓаат до судиски одлуки.