Познатата плажа Навајио (Ναυάγιο) во истоимениот залив на Закинтос, Грција, летово ќе остане затворена за туристи поради страв од лизгање на земјиштето, најавија грчките власти.
Плажата некогаш беше прогласена за најдобра на светот, а препознатлива е по белите карпи и тиркизните нијанси на Јонското Море.
Одлуката за забрана за пристап до плажата Навајио ја препорача тим експерти од Организацијата за антисеизмичко планирање и заштита (ОАСП), по посетата на плажата на 8 март како дел од редовната безбедносна проверка.
Тимот на ОАСП соопшти дека постои значителен ризик од лизгање на земјиштето поради ерозијата на околните карпи.
„Безбедноста на жителите и посетителите е пред сѐ, и одлуката е донесена земајќи ги предвид новите научни податоци на ОАСП и неговиот претседател, професорот Ефтимиос Лекас, со оглед на големиот број посетители на областа за време на туристичката сезона“, рече грчкиот министер за туризам Василис Кикилиас.
Посетата на плажата Навајио веќе е забранета за локалното население и посетителите од септември минатата година, откако земјотресот со јачина од 5,4 степени по Рихтер предизвика големи камења од околните карпи да паднат во заливот.
Навајио е една од најпрепознатливите плажи во Грција, чии фотографии од заглавениот брод се составен дел од брошурите на туристичките агенции. Воедно е и една од најпосетуваните, а загриженост предизвикаа ланските фотографии од загаденоста.
Порано позната како Ајос Јеорјиос, Навајио на грчки значи бродолом. Многумина погрешно ја изговараат како Навагио.
