Во април 2021 година, потрошувачките цени на САД забележаа најголем пораст во изминатите 12 години како резултат на експлозивното зголемување на побарувачката во услови на ограничена понуда. Тоа, според американски медиуми може дополнително да ги разгори стравувањата на финансискиот пазар од подолг период на повисока инфлација.
Министерството за труд на САД денеска објави дека инфлацијата скокнала за 0,8% на месечно ниво во април, откако порасна за 0,6% во март. Тоа е најголемо месечно зголемување од јуни 2009 година.
Цените на храната во САД се зголемија за 0,4% во април, додека цените на бензинот паднаа за 1,4% по зголемувањето за 9,1% во март. Сепак, цената на бензинот најверојатно повторно ќе порасне во мај, бидејќи пумпите низ целата земја веќе остануваат без гориво откако делумно беше затворен гасоводот Colonial Pipeline по хакерски напад врз компанијата минатиот петок.
На годишно ниво, инфлацијата се зголеми за 4,2% во април, што е најмногу од септември 2008 година.