Дали на повидок е нов хаос во Серија А? Поради двајца позитивни Наполи не се појави синоќа во Торино, Јувентус бара службена победа. Затоа пак Милан и Аталанта победија, додека дербито во Рим заврши без победник.
Немаше синоќа дерби на дождливото време во Торино. Играчи на Јувентус беа на стадионот, но гостите од Неапол уште претходно најавија дека нема да ни да отпатуваат. Протоколот на Лега Калчо за позитивни фудбалери во Серија А вели дека само при голема бројка тимот може да побара одлужување на натпревар, како во случајот со Џеноа, но Наполи се реши да го игнорира тоа. „Партенопеите“ имаат двајца позитивни играчи и тоа Пјотр Желињски и нашиот Елиф Елмас.
На тешки маки е сега Лега Калчо бидејќи следејќи го протоколот треба да додели службена победа за Јувентус што секако ќе го разлути Наполи, а ќе ги расипе односите и со останатите клубови кои таквата одлука ќе ја гледаат како уште едно фаворизирање на „Старата дама“.
Милан оствари победа од 3:0 над новакот Специја со три гола во вториот дел. Два гола на Португалецот Рафаел Леау и еден на Тео Ернандес им донесоа на „Росонерите“ трета победа и перфектен старт на сезоната.
Перфектна остана и Аталанта која во голеада со 5:2 го совлада Кањари. Сите голови за домаќините ги постигнаа различни играчи и тоа Луис Муриел, Папу Гомес, Марко Пашалиќ, Дуван Сапата и Сам Ламерс, додека за гостите погодија Диего Годин и Жуау Педру.
Дербито во Рим помеѓу Лацио и Интер заврши со реми 1:1 и во голови и во црвени картони. Гостите од Милано поведоа по 30 минути игра преку Лаутаро Мартинес, а Сергеј Милинковиќ-Савиќ се погрижи за израмнување 10 минути после паузата. Во 70. минута Чиро Имобиле реагираше неспортски со шамар замавнувајќи кон Артуро Видал па главниот судија Марко Гуида му покажа директен црвен картон, на 3 минути пред крајот Стефано Сенси го турна Патрик по што и тој доби исклучување.
Следува репрезентативна пауза, а Серија А ќе продолжи со 4. коло на 17 и 18 октомври.