Првото целосно затемнување на Месечината во последните две години ќе се случи денеска: тоа ќе биде крвава супермесечина што ќе може да се види од делови на Азија, Австралија, САД и Јужна Америка, објави НАСА.
Благодарение на затемнувањето, сите заинтересирани ќе можат да ја видат таканаречената крвава супермесечина, објави НАСА, додавајќи дека тоа најјасно ќе го видат во жителите на Хаваите, Алјаска и западните амеркански држави.
Крвавата супермесечина обично се појавува при целосно затемнување на Месечината, во моментот кога Земјата ќе се најде директно помеѓу Месечината и Сонцето, криејќи ја Месечината од сончевата светлина, и го доби името „крвава“ поради црвениот сјај.
„Кога тоа ќе се случи, единствената светлина што во тој момент достигнува на површината на Месечината поминува низ рабовите на Земјината атмосфера. Молекулите на воздухот од атмосферата на Земјата расфрлаат најголем дел од сината светлина, а преостанатата светлина се рефлектира на површината на Месечината со црвен сјај“, објаснија научниците од НАСА.
Последица на ваквите настани е „светлосен прстен“ околу Месечината, но астрономите сè уште не можат да предвидат до кој степен ќе биде црвено бидејќи може да биде под влијание на прашина во атмосферата, соопшти НАСА.
Мајската супермесечина е една од трите оваа година и ќе биде најголема меѓу нив. Супермесечина се јавува кога Месечината изгледа поголема од вообичаено затоа што е најблиску до Земјата.
Самото затемнување ќе трае околу 14 минути, а целиот настан околу пет часа, а ќе можат да го видат навечер во Азија и во раните утрински часови во САД.