Навивачите се вратија во салите во САД, но малкумина очекуваа дека тоа ќе донесе вакви проблеми. Синоќа се случи нов инцидент, кој ги загрижи играчите.
Деновиве видовме како Треј Јанг беше плукан, се фрлаа пуканки кон Расел Вестбрук, додека Кајри Ирвинг беше гаѓан со шише. Ноќеска, на натпреварот Вашингтон Визардс - Филаделфија 76ерс, навивач истрча на паркетот на сред натпреварот во „Капитал Уан“ арената во амерканската престолнина.
Инцидентот се случи пред крајот на третата четвртина кога еден млад човек истрча од трибините и стигна на паркетот, а обезбедувањето реагираше брзо и го сруши како во американски фудбал.
Публиката негодуваше поради потегот на младиот човек, кому му се заканува и доживотна забрана за присуство на натпреварите на Вашингтон Возардс, чиј навивач очигледно е. Тој не можеше да го догледа натпреварот до крај и да види како неговиот тим победува (122:114) и со тоа намали на 3:1 во серијата подобар од 7.
Поради низата инциденти што се случија за кратко време, играчите очекуваат реакција од НБА лигата бидејќи се плашат од нови и поголеми проблеми.
Во вториот натпревар одигран ноќеска Јута Џез славеше на гостувањето кај Мемфис Гризлис со 113:120 и поведе со 3-1 во партии.
