Навивачите на Тотенхем не паметат поболна провокација од синоќешната на Варди

Еден од култните херои на англиската Премиер лига во последните години, Џејми Варди, на многу интересен начин го дочека своето враќање во друштвото на најдобрите во дресот на Лестер Сити.

Искусниот капитен на Лестер, кој го предводеше овој тим до сензационална титула во Премиер лигата, остана со клубот дури и кога испадна во Чемпионшип во мај 2023 година. Oстана во клубот, освои промоција и синоќа на најдобар можен начин се врати во Премиер лигата во доцните играчки години (има 37).

Лестер на Варди се сретна со Тотенхем и долго време заостануваше по голот на Педро Поро. Сепак, „Лисиците“ не се предадоа, па токму преку Варди дојдоа до израмнување и првиот бод во Премиер лигата по една година чекање.

Поранешниот англиски репрезентативец постигна гол за 1:1, а потоа набрзо го напушти теренот. Сепак, во таа прилика успеа да ги исмее гостинските навивачи на начин на кој ретко кому ќе му текне.

Варди се сврте кон навивачите на Тотенхем, им го покажа грбот на Премиер лигата, а потоа со раце покажа дека има една титула, а навивачите на Тотенхем ниту една. Сцената, очекувано, стана вирална.

Но, Лестер има една лигашка титула, а Тотенхем има две. Тогаш на што алудираше Варди?

Искусниот напаѓач сепак не погреши. Гледајќи ја само Премиер лигата, на чиј грб покажа, Варди е во право бидејќи тој навистина освои една титула повеќе од Тотенхем. Од друга страна, Тотенхем двапати ја освојуваше титулата англиски шампион (во 1951 и 1961 година), но никогаш откако е ребрендирана во Премиер лига.

Варди имаше колосална шанса и да го реши победникот кога во 71. минута им избега на гостинските бекови, излезе сам пред голманот, но Италијанецот Гиљелмо Викарио успеа да го спречи да погоди за 2:1.