Италијанската полиција утрово уапси 56 лица ширум земјата за врски со мафијашката група 'Ндрангета и заплени имот вреден околу 250 милиони евра.
Обвиненијата со кои се соочуваат осомничените вклучуваат изнуда, киднапирање, трговија со оружје, корупција и измама, меѓу другото.
Франческо Месина, шефот на антикриминалното тело на државната полиција, рече дека „силната операција на судската полиција... ни овозможи да ја разбиеме жестоката мафијашка група“.
Тој понатаму додаде дека „огромната вредност“ на запленетиот имот „ја потврдува економската моќ на кланот 'Ндрангета кој конечно е погоден“.
Полициската операција доаѓа само една недела откако еден од најбараните италијански бегалци, злогласениот сицилијански мафијаш Матео Месина Денаро, беше уапсен во Палермо.
Кланот 'Ндрангета има свои корени во јужниот регион на Калабрија, но сега се проширил низ полуостровот и во остатокот од континентот. Тој е инволвиран во шверц на дрога во Европа, одржувајќи силни врски со јужноамериканските картели.