Столбот на одбраната на „Нераѕурите“ се очекува до крајот на неделава да премине во ПСЖ, но и други играчи се очекува да го следат примерот на словачкиот репрезентативец.
Интер мора да продаде еден од своите најдобри играчи за да може да носи нови засилувања, а клучниот датум за продажбата е последниот ден од тековниов месец - 30 јуни. Тоа е така бидејќи токму на овој датум завршува финансиската година. Во моментов централниот дефанзивец Милан Шкринијар е најголем кандидат за заминување со добра отштета.
Информациите велат дека Интер ја одбил понудата на ПСЖ од 60 милиони евра плус Јулиан Дракслер бидејќи сака само кеш, односно не помалку од 70 милиони. За деновиве закажан е нов состанок помеѓу двете страни кога и конечно треба да се договорат за трансферот.
Но, Шкринијар нема да биде единствениот кој ќе си замине. На излезната врата од „Меаца“ се уште неколкумина играчи почнувајќи од оние со големи плати како Чилеанците Алексис Санчес и Артуро Видал. И двајцата имаат договор до 2023 година, но постои опција Интер да им плати 4 милиони за да им го раскине договорот една година порано - со што сепак ќе биде во ќар. Наскоро клубот ќе има состанок во Фернандо Фелисевич, нивниот агент, со кого ќе се обиде и таа сума да ја намали.
Што поскоро се очекува Себастиан Еспозито да потпише со Андерлехт, најпрво како позајмен со опција за откуп за 10 милиони евра. Монца откако го доведе Андреа Ранокиа сега е во преговори со Лоренцо Пирола и Стефано Сенси, а се интересира и за Андреа Пинамонти. Сенси сепак можно е да заврши во подобар клуб бидејќи за неговите услуги заинтересирани се и Аталанта и Фиорентина.
На излезна врата е и младиот Лусјан Агуме и голманот Јонуц Раду, кои би требало да завршат во изненадувачкиот повратник во Серија А - Кремонезе. Од позајмици се вратија Далберт и Валентино Лазаро, но тие не се во плановите на Симоне Инѕаги, па Интер е подготвен да слушне било какви понуди за нив двајца.