Нејмар по 12 години заигра за Сантус: Противниците го испотепаа, па се фотографираа со него

Бразилската фудбалска ѕвезда Нејмар по 12 години заигра за Сантус и покажа дека уште има магија во неговите нозе.

Сантус го пречека Ботафогу, а Нејмар натпреварот го започна на клупата за резервни играчи.

„Принцот“, како што го нарекуваат популарните „Алвинегру“, влезе во игра на полувремето при водство на неговиот тим со 1:0 и за 45 минути покажа зошто е идол на целата нација.

Противничките играчи не бираа средства за да го спречат, па доби многу жестоки удари.

Сепак, по натпреварот видовме сцена која е навистина ретка на фудбалските терени.

Сите играчи и целиот стручен штаб на Ботафогу застанаа во ред по мечот и трпеливо чекаа еден по еден да се фотографираат со Нејмар.

„Не можам да опишам како се чувствував вечерва, кога повторно стапнав на теренот во дресот на Сантус. Не сум 100% подготвен, па не очекував да трчам и да дриблам толку многу на овој натпревар. Ќе бидам вистинскиот јас по 4 или 5 натпревари“, изјави Нејмар по натпреварот кој заврши 1:1.