Судот во Италија ја одби жалбата на бразилскиот фудбалер Робињо и така ја потврди затворската каза од 9 години поради групно силување.
Поранешната ѕвезда на Милан, Реал Мадрид и Манчестер Сити ќе мора да отслужи 9 години затвор откако судот ја отфрли жалбата.
Станува збор за настан од 2013 година во еден ноќен клуб во Милано. Во таа прилика, според пресудата на судот, Робињо силувал 23-годишна Албанка заедно со уште петмина негови пријатели, пишува Marca. Тој првично беше осуден во 2017 година. Веќе нема право на жалба што значи дека оваа судска одлука е конечна.
Покрај него, осуден е и неговиот пријател Рикардо Фалко, додека останатите четворица силувачи побегнале во Бразил каде им се губи трагата. Медиумите пишуваат дека Робињо бил расплакан во текот на изрeкувањето на пресудата.
Уште не е познато каде ќе ја отслужи казната, дали во Бразил или Италија. Моментално се наоѓа во Бразил. Робињо ќе мора да плати и 60.000 евра отштета на жртвата.