За време на неодамнешна експедиција во главно неистражените длабочини на северното подрачје на Средноатлантскиот гребен, научниците наидоа на нешто многу чудно - ситни дупки на дното на океанот, наредени во десетици прави линии.
Сè би било во ред, односно немаше да има ништо необично во ова откритие, доколку тие дупки не беа среде ништо и на голема длабочина; приближно 2,5 километри под површината на Атлантскиот Океан.
На тоа место и на тие длабочини немало никакви човечки активности, немало ископувања или неодамнешни научни анализи. И прашањето е дали морските животни можат да откопаат толку прецизен и рамномерен модел и за која цел.
На 23 јули, специјалисти од бродот Okeanos Explorer на Националната океанска и атмосферска администрација на САД (NOAA) истражија подводен вулкански гребен северно од архипелагот Азорски со роботска подморница и фотографираа необични структури на дното на океанот. Околу една недела подоцна, на околу 483 километри, пронајдоа уште четири групи од овие мистериозни дупки, на длабочина од 1,6 километри.
NOAA побара мислење од јавноста и ги праша луѓето на официјалните Facebook и Twitter што мислат дека научниците снимиле во таа прилика. Добила различни одговори - од вонземјани и непознат вид на рак до истекување на гас.
„Иако се чини дека дупките се создадени од човек, малите наслаги на талог околу нив укажуваат дека некој или нешто ги ископал. Се обидовме да ѕирнеме во нив и да ги допреме со алатките на подморницата, но не успеавме“, напиша NOAA во соопштението.
За да биде мистеријата поголема, ова не е првпат да наидуваат на вакви дупки. Тие ги збунуваат експертите најмалку 20 години. Имено, тие се споменати во истражувањето од 2004 година кое било спроведено во истиот регион. Научниците тогаш ги нарекоа „lebensspuren“, што на германски значи „траги од живот“, пишува Science Alert.
„Причината и процесот на формирање на овие дупки не се познати, но седиментот околу нив покажува дека тоа би можело да биде копање на некој генијален организам. Ниту еден од нашите блиски кадри не покажа знаци на живи организми кои ги населуваат дупките“, напишаа научниците во 2004 година.
Оттогаш поминаа речиси дваесет години, а научната заедница не е помудра за околностите на формирањето на овие чудни дупчиња. Но, неодамнешната мисија може да даде некои одговори. Имено, за време на експедицијата, експертите успеале да соберат примероци од седимент околу дупките, а нивната анализа би можела да одговори на прашањето дали таму живее некој вид морски суштества.
„Нешто важно се случува таму, а ние не знаеме што. Ова покажува дека сè уште има мистерии“, изјави биологот на NOAA Мајкл Векионе за The New York Times.
Средноатлантскиот гребен е најдолгиот планински венец во светот, кој се протега на импресивни 16.000 километри. Не знаеме многу за тој регион, па NOAA испрати експедиција за истражување на областа од мај до септември 2022 година.
Научниците ќе ја проучуваат и зоната на раседот Чарли-Гибс каде што се спојуваат три главни тектонски плочи. Средноатлантскиот гребен е жариште за земјотреси поради својата локација, но крие и неверојатни хидротермални отвори кои овозможуваат развој на живот на големи океански длабочини.
Следното нуркање експедицијата ќе го направи на 7 август, кое ќе можеме да го гледаме во живо.
„Потеклото на овие дупки останува мистерија, а непознатите со кои се среќаваме често се длабоки и мистериозни како самиот океан. Меѓутоа, со секоја експедиција за мапирање и истражување на длабочините на океанот, учиме повеќе за овој витален екосистем“, наведува NOAA.
