Крвави трупови, некои обезглавени, натрупани на куп за да бидат спалени - Еквадор вчера беше згрозен од насилството што се случи еден ден претходно во затворите каде што војуваат наркокартелите и во кои беа убиени 79 затвореници во еден ден .
Ова е „војна на криминални банди до истребување“, рече претседателот Ленин Морено, еден ден по настанот што го нарече „варварство“.
Никогаш порано оваа мала земја со 17,4 милиони жители, сместена помеѓу Тихиот Океан, Андите и амазонската прашума, не доживеала таква криза во затворскиот систем.
Серија немири и судири избувнаа во вторникот во исто време меѓу наркобандите кои се бореа за власт во затворите во Гвајакил, Куенка и Латакунги, градови во кои е сместено 70 проценти од затворското население.
„Ова е масакр без преседан“, рече народниот правобранител, јавно тело за заштита на човековите права.
Според последните податоци објавени вчера, убиени се 79 затвореници: 37 во Гвајакил, 34 во Куенка и осум во Латакунга, изјави директорот на затворскиот систем (СНАИ) Едмундо Монкајао. Други затвореници и полицајци биле повредени, но нивниот број не е познат.
Куенка, третиот по големина град на Еквадор со 600.000 жители, беше шокиран кога јавниот обвинител Леонардо Аморосо рече дека „осумнаесет трупови биле обезглавени, а некои дури биле подготвувани за спалување“.
Владата објави дека станува збор за пресметка меѓу две наркобанди.
„Ова не е случајно. Ова беше организирано однадвор и внатрешно координирано од оние кои се бореа за контрола во шверцот на дрога низ целата држава“, додаде Морено.
Пред затворот, членовите на семејството со нетрпение чекаа вести за нивните најблиски.
Властите соопштија дека најмалку четири наркобанди дејствуваат во тие затвори: Лос Пипос, Лос Лобос, Тигронес и Чоне Килерс.
Претседателот Морено на помош ја повика армијата, која „ќе изврши контрола на оружје, експлозиви и муниција во близина на казнено-поправните установи 24 часа на ден, колку што е потребно“.
Канцеларијата на ООН во Еквадор во средата повика на „брза и објективна истрага“ и повика на „казнување на одговорните и управување со кризата во согласност со одредбите на Уставот и меѓународните инструменти за човекови права“.
Властите соопштија дека воспоставиле контрола во затворите.
Еквадор има шеесетина казнено-поправни установи со 29.000 места. Но, во нив има скоро 30 проценти затвореници: 1.500 чувари на 38.000 затвореници, а експертите предупредуваат дека ќе бидат потребни 4.000 за ефективна контрола.
Владата минатата година се обиде да го спречи насилството во затворот со прогласување вонредна состојба за три месеци за да може да ја распореди војската како засилување.
Народниот правобранител вели дека во 2020 година биле пријавени „103 убиства“ во еквадорските затвори.
