Лос Анџелес Лејкерс во вториот натпревар во финалето на Западната конференција во НВА доигрувањето ги победија Денвер Нагетс со 105:103 и дојдоа до водство во серијата со 2:0.
За разлика од минатиот натпревар, на отворањето овојпат не видовме толку ефикасна кошарка, но тоа се смени во продолжение. Во почетокот Леброн Џејмс беше одличен и ги запиша првите 10 поени за Лејкерс кои го завршија првото полувреме во своја корист со резултат 60:50.
Во третата четвртина Нагетс ја намалија разликата и во последните 12 минути влегоа со 4 поени застанување (82:78). Лејкерс на средината на последната четвртина се „одлепија“ со шест разлика, но тука проработи магијата на Никола Јокиќ кој запиша 11 последователни поени за својата екипа, па Денвер на 20 секунди пред крајот дојде до водство со резултат 103:102.
Радоста на екипата од Колорадо ја расипа тројката на Ентони Дејвис која со звукот на сирената го даде конечниот резултат и ја донесе победата на Лејкерс.
Дејвис го заврши натпреварот со 31 поен и девет скока, а Џејмс постигна 26 поени и собра 11 скока. Јокиќ заврши со 30 поени, девет асистенции и шест скока.
