Во петокот, на филмскиот фестивал Трибека во Њујорк се појави актерот Брендан Фрејзер, којшто во 90-тите години беше на врвот на славата и имаше армија обожавателки. Со години овој актер живее далеку од светот на филмот, па неговото појавување на фестивалот предизвика големо внимание.
Со оглед на тоа што Фрејзер ретко се појавува во јавноста, неговото присуство на фестивалот беше поради промоција на крими драмата „No Sudden Move“. Неговиот изглед ја збуни јавноста, тој изгледа поинаку од тоа што публиката го памети по улогите во „George of the Jungle“ (1997) и трилогијата „The Mummy“. Многумина на Twitter по објавувањето на фотографијата од фестивалот, прашуваат дали актерот има проблеми со здравјето.
Неодамна Фрејзер најави враќање во драмата „The Whale“ во која толкува лик на средовечен маж којшто тежи над 250 кг, живее во Ајдахо и се обидува да се зближи со својата 17-годишна ќерка.
Актерот во 90-тите години беше многу популарен, публиката ја освои со привлечниот изглед и шармантната насмевка. Улогата на Џорџ го прослави во 1997 година, а по деценија успешни улоги реши да го смири темпото на работа. До скоро воопшто никаде не се појавуваше, ниту имаше позначајни улоги.
Во 2010 година практично се повлече од Холивуд, а се појавуваше во помали улоги. Актерот има три сина на кои многу им е посветен.
Како причина за неговото повлекување во ретко интервју за GQ тој изјави дека влијателниот новинар Филип Берк, претседател на Hollywood Foreign Press Association сексуално го нападнал во 2003 година. Иако судски не го тужел, го пријавил на Здружението, но неговите наводи биле игнорирани по што тој со години водел битка со депресија.
