Една по една, полека се откажуваат трките од сезонава во Ф1. Денеска организаторот потврди дека формула сезонава нема да се вози и во Холандија.
Поради пандемијата со COVID-19 се откажа уште една трка од сезоната 2020 која никако ни да почне. Организаторите на долгоочекуваното Холандско Гран-при потврдија дека земјата на лалињата сезонава нема да ја одржи својата трка.
Холанѓаните за оваа сезона го планираа враќањето во Ф1 по 1985 година и тоа со реконструирана патеката Зандворт, а Макс Верстапен едвај чекаше да се трка пред домашната публика. Сепак, сето тоа ќе мора да почека барем до наредната 2021 сезона.
Организаторот информира дека целосно бил подготвен да ја одржи трката, но бидејќи тоа морало да биде без публика, решија да ја откажат. Првично закажано за 3 мај, потоа одложено за нов, недефиниран датум, Гран-прито на Холандија сега е веќе откажано.
„Бевме целосно подготвени за оваа трка и сѐ уште сме. Ние и Ф1 ја разгледувавме можноста годинава да одржиме трка на нов датум без публика, но работата е што ние сакаме враќањето на Формула 1 во Зандворт да го прославиме заедно со нашите фанови во Холандија“, изјави поранешниот возач Јан Ламерс, сега директор на Холандското ГП.
Сите оние кои веќе имаат набавено карти за трката истите ќе можат да ги употребат и наредната сезона.
Холандското ГП е четврто откажано сезонава по оние во Австралија, Монако и Франција. Шест други се со статус на одложени, но без дефиниран датум.