Европската радиодифузна унија (ЕБУ) соопшти детали во врска со годинашниот Избор за песна на Евровизија, што треба да се одржи во Ротердам, Холандија од 18 до 22 мај.
Откако минатата година Евросонг беше откажан поради пандемијата на COVID-19, организаторите се погрижија таков исход да не се случи оваа година. Тие понудија неколку можни сценарија во поглед на организацијата на настанот.
Сценариото А вклучува нормална организација на Евросонг, како и сите претходни години, со публика и изведувачи на сцената во живо. Сепак, ова сценарио дефинитивно е отпишано и организаторите рекоа дека до мај ќе одлучат дали ќе се реализира Сценарио Б, В или Г.
Во сценариото Б, процентот на публика во салата е намален на 80%, а во прес-центарот може да има само 500 новинари, додека 1.000 би го следеле настанот виртуелно. Сите изведувачи и посетители кои би присуствувале во живо настанот, ќе мора да одржуваат дистанца од најмалку 1,5 м.
Во сценаријата В и Г, никој од изведувачите и членовите на делегациите не би дошол во Ротердам, туку настапите би се емитувале во живо од националните телевизиски студија.
Во сценариото В, публиката ќе биде во живо во салата, а сите новинари ќе присуствуваат на шоуто виртуелно.
Најстрогото, сценариото Г, предвидува настапи без публика во салата и без придружни настани.
Според објавените информации на официјалната веб-страница, меѓу учесниците ќе биде и претставникот од Република Северна Македонија.
