Редизајнираниот модел има стилски измени и технолошки подобрувања.
Nissan Patrol има репутација на масивен и издржлив SUV, а со најновиот редизајн само го зацврсти таквиот имиџ.
Најмногу стилски измени има на предниот дел на возилото, вклучувајќи ја маската на ладилникот, фаровите и браникот, а назад се рестилизирани стоп светлата.
Внатрешноста на Patrol изгледа полуксузно благодарение на новиот ентериер покриен со кожа. Јапонскиот производител истакнува дека е намалено нивото на бучава во кабината што доаѓа од надворешни извори, благодарение на подобрената звучна изолација.
На централната козола доминираат два големи екрани поврзани со навигација и мултимедијален систем со Apple CarPlay и Android Auto функции за полесно поврзување со смартфон уреди.
Во бројните системи за безбедност спаѓаат и интелигентното автоматско кочење во случај на опасност со функција за детектирање пешаци, како и систем за предупредување од можен фронтален удар.
Nissan Patrol 2020 стандардно ќе се испорачува со 4.0-литарски V6 бензински мотор со 275 коњски сили и максимален вртежен момент од 395 Nm, додека за купувачите кои сакаат нешто повеќе, достапен е и опционалниот 5,6-литарски V8 мотор кој нуди 400 коњски сили и максимален вртежен момент од 560 Nm. Помоќната варијанта во понудата го има и адаптивниот систем за потпирање на Nissan - Hydraulic Body Motion Control.
Рестилизираниот Nissan Patrol ќе биде пуштен во продажба до крајот на месецот и тоа прво на Блискиот Исток бидејќи тоа е еден од најважните пазари за овој луксузен модел.