Кинеската компанија Alibaba постави нов рекорд во продажба на стоки преку интернет во вредност од 56 милијарди американски долари за време на годинашниот празничен шопинг, Денот на самци, но тој подвиг беше засенет од падот на акциите на компанијата за 8,0 проценти предизвикан од предложените кинески антимонополски регулативи.
Денот на самци е традиционален 24-часовен трговски настан во Кина кога продавачите нудат десетици милиони производи со огромни попусти на платформите за е-трговија управувани од Alibaba, JD.com и други. Кинескиот празничен шопинг има поголем промет од Black Friday и Cyber Monday во САД заедно, пренесува СNBC.
Оваа година онлајн трговците JD.com и Аlibaba го продолжија шопинг празникот кој почна на 1 ноември и ќе трае до 12 ноември до полноќ.
Аlibaba соопшти дека бруто вредноста на стоките (ГМВ), бројка што ја покажува вкупната вредност на нарачките преку платформите за онлајн купување на Аlibaba, надминала 372,3 милијарди јуани (56,42 милијарди долари) до пладне по пекиншко време. Таа сума ја вклучува вкупната вредност на нарачките од почетокот на настанот на 1 ноември.
Оваа сума е значително поголема од 268,4 милијарди јуани ГМВ, што Аlibaba ги регистрира минатата година за време на 24-часовното тргување на Денот на самците.