Македонската етно музичка група Љубојна го објави најновиот сингл насловен „Љубов по Татунчо“.
Песната е дел од музиката за македонскиот игран филм „Стела“ на режисерот Стојан Вујичиќ чија премиера закажана за во март беше одложена поради корона кризата.
Композитор и аранжер на „Љубов по Татунчо“ е Оливер Јосифовски, а текстот инспириран од „Татунчо“ на Кочо Рацин е на вокалистата Вера Јосифовска.
Спотот за новиот сингл е снимен во продукција на Dream Factory Macedonia и TulipPro, а музиката во Студио Подрумот.
Објавувањето на новиот сингл е воедно и најава за новиот албум на Љубојна со целосната музика од филмот „Стела“.
Групата „Љубојна“ постои речиси 20 години и зад себе има бројни домашни и интернационални концерти, вклучувајќи ги и оние во Кина и во Њујорк. Во 2016 година групата беше прогласена за „супербренд“. На почетокот на 2017 година излезе деветтиот албум на групата со наслов „Радио Љубојна“, снимен во Студио Подрумот. На албумот, продуциран од Оливер Јосифовски, се наоѓаат осум песни, меѓу кои и: „Кратово виа Бразил“, „Галичник виа Њујорк“, Многу ми го фалат вашето девојче“, „Стани да не станиш“. На 23 февруари 2017 година, групата одржа концерт во Домот на синдикатите во Белград, на којшто го претстави деветтиот албум „Радио Љубојна“. Како гости на концертот настапија Влатко Стефановски, Васил Хаџиманов и Џамбо Агушев.
Стојан Вујичиќ е еден од водечките македонски режисери, чиј опус вклучува бројни кратки играни и документарни филмови, и телевизиски проекти. Познат е по филмовите „Брат за еден ден“, „Допир“ и „Годините го чинат своето“, прикажувани и наградени на престижни филмски фестивали.