Новата мисија на НАСА успешно ја заврши првата фаза од операцијата, откако сондата OSIRIS-Rex се спушти на астероидот за да собере примероци од неговата површина.
Примероците се земени со помош на „ механичка рака“ (Touch-And-Go Sample Acquisition Mechanism arm), а потоа се складирани во посебна капсула. Со помош на камерите е откриено дека дел од примероците почнале да се разлеваат надвор, па затоа НАСА испрати команда на леталото што побрзо да ја затвори капсулата и тоа е успешно направено.
Примероците сега се наоѓаат во безбедно запечатен контејнер кој на Земјата ќе пристигне во 2023 година, што значи дека ни преостанува долго патување низ вселената.
Шефот на НАСА Џим Брајдстајн се пофали за досегашниот успех на мисијата и рече дека овие примероци ќе ни помогнат да осознаеме многу повеќе работи за себе и за вселената, што е и целта на овие истражувања.
Моментално, OSIRIS-Rex се наоѓа 330 милиони километри од Земјата. Фокусот на мисијата е враќањето на примероците на Земјата, со што почнува фазата Earth Return Cruise.