Премиерката на Нов Зеланд Џасинда Ардерн соопшти продолжување од 12 дена на рестриктивните мерки за заштита од COVID-19, откако кластерот нови случаи се искачи на 29.
Во Нов Зеланд има четири нивоа на алармантност, а Окленд е на Ниво 3 од завчера.
Остатокот од земјата е на Ниво 2, а Ардерн рече дека и двете ќе бидат продолжени.
Нов Зеланд успеа да ја запре заразата со новиот коронавирус и забележа 102 дена без локална трансмисија.
Уште се истражува потеклото на кластерот во Окленд, најголемиот град во Нов Зеланд каде живеат 1,5 милиони луѓе.
Премиерката рече дека одлуката за продолжување на рестриктивните мерки е „во согласност со нашиот претпазлив пристап и философијата на Нов Зеланд да се настапи агресивно и рано“.
Таа рече дека за 12 дена очекува кластерот да биде идентификуван и изолиран и дека ќе можеме самоуверено да го вратиме Окленд на Ниво 2“.
На прашањето дали се очекуваат нови случаи од кластерот, Ардерн рече дека кластерот „ќе расте пред да забави“.
Ниво 3, кое е прогласено во Окленд, значи затворање на сите јавни институции и згради – библиотеки, музеи, киносали, игралишта...
Луѓето мора да работат од дома каде што е тоа возможно, а децата се препорачува и охрабрува да учат од дома. До граѓаните се апелира да останат во нивното „домашно опкружување“ кога не се на работа, односно училиште.
Супермаркетите и бензинските станици може да работат, но сите други бизниси каде има „близок контакт“ мора да бидат затворени.