Главниот град на Франција доби нова туристичка атракција - автобус амфибија.
Како дел од турата со ова превозно средство, туристите ќе возат низ улиците на Париз за да ги видат знаменитостите на француската престолнина, а потоа автобусот ќе се претвори во речен брод за забава и ќе плови по Сена.
Верзијата што се користи во Париз е нов дизајн изграден воглавно во Франција и според неговите оператори, тоа е првото амфибиско возило што има дозвола за превоз на туристи по друмските и водните патишта во Париз.
Оваа недела првите патници возејќи се во автобусот ги набудуваа знаменитостите на Париз, како што се Триумфалната порта и Ајфеловата кула. Потоа автобусот премина во речен режим, вклучувајќи го и пропелерот од задната страна, за да може да плови по Сена.
Како мерка на претпазливост, од едната страна беше подготвено сидро, како и елеци за спасување на патниците.
Предниот дел на автобусот е сличен по форма на брод, за да може полесно да влезе во вода, а располага и со пешачки мост кој се користи за качување. Во споредба со традиционалниот автобус, оваа палуба е особено висока, со цел да биде што подалеку од водата, од безбедносни причини.
Пловечките автобуси, познати и како „патки“, со години се користат за превоз на туристи низ градовите низ светот.
Првата компанија што имала таканаречени патка тури била основана во 1946 година во Висконсин. Денес вакви тури се нудат како туристичка атракција во Бостон, Сиетл, Даблин, Лондон, Будимпешта.
