Битолчанецот Никола Зацески се пофали со одлична изведба на македонскиот хит „Лихнида кајче веслаше“ проследен со видео-запис.
Песната компонирана од Ефто Пупиноски со текст на Мирослав Кузман и аранжман на Миодраг Божиноски која во 1986 година го освои првото место на „Фолк Фест Валандово“ после 35 години доби уште една верзија.
Зацески, кој од 10-годишна возраст свири пијано, предавал како професор со средното музичко училиште „Климент Охридски“ во Битола, од 2018 е преселен во Австралија,
„Со огромно задоволство ви ја претставуваме 'Лихнида' во едно поинакво светло. Длабоко од моето срце и душа произлезе инспирацијата за овој проект, а особено ми е драгоцен бидејќи и јас ќе дадам мал допринос во збогатувањето на нашиот мозаик на македонски песни, кои треба вечно да бидат препејувани и слушани од сите наши нови генерации. Се надевам ќе уживате во нашата магична бајка“, напиша Зацески на Facebook по повод објавувањето на спотот за „Лихнида“.
Неговата „Лихнида“ ја сними студио XL Momirovski, обработката и оркестрацијата ја направи Никола Мицевски, видео монтажата е на Даниел Ковески, продукцијата на Creatix Production, а на виолина свират Владимир Крстев и Илија Филиповски.
Оваа е прва песна од неговиот нов албум кој ќе биде со преработки на стари македонски песни во придружба на „Симфониски Оркестар“.
