По ажурирањето на софтверот објавено од Google за најновите флегшип телефони, корисниците на Pixel 6 известуваат дека нивните уреди автоматски ги одбиваат повиците.
Мобилните телефони на Google веќе имаа проблем со менување на вибрациите за известувањата кои се менуваа без објаснување, а сега имаат уште поголеми потешкотии бидејќи уредите автоматски и „тивко“ ги одбиваат дојдовните повици, испраќајќи го повикувачот директно на говорна пошта.
При преглед на листата со повици, корисниците забележуваат дека дојдовниот повик бил „одбиен“, а мобилниот воопшто не заѕвонил. Сите корисници со овој проблем тврдат дека немаат поставка „Do Not Disturb“ или друга активна опција што може да ги блокира повиците.
Засега нема друг начин да се реши овој проблем освен ресетирање на мобилниот телефон. Корисниците на Pixel 6 и Pixel 6 Pro најмногу се жалаат на проблемите, но проблеми имаат и оние кои поседуваат постари Pixel уреди до моделот 2XL.