На Волстрит вчера, S&P 500 достигна ново рекордно ниво, како и индексот Nasdaq, но тргуваше внимателно додека се чекаат нови економски индикатори и квартални деловни извештаи од компаниите.
Dow Jones зајакна 9 поени или 0,03 проценти на 34.292 поени, додека S&P 500 порасна за 0,03 проценти, на 4.291 поен, а индексот Nasdaq порасна 0,19 проценти, на 14.528 поени.
Четвртиот рекорден досег на индексот S&P 500 по ред се должи на порастот на цените на акциите во три од 11-те најважни сектори, и најмногу во технологијата, за 0,7 проценти.
Но, се тргуваше претпазливо, како што покажува и потпросечниот обем на тргување. Вчера беа разменети 9,6 милијарди акции на американските берзи, додека просечниот обем во последните 20 дена изнесуваше 11 милијарди.
Инвеститорите се воздржани пред новите важни економски показатели, како што е бројот на нововработени во јуни, што може да влијае на понатамошните одлуки на Федералните резерви на САД, за кои заздравувањето на пазарот на трудот е еден од приоритетите.
„Ако податоците се солидни и ако стапката на невработеност се намали, тоа може да ја смени реториката на ФЕД“, вели Мајк Зигмонт, директор на Harvest Volatility Management.
Претставници на ФЕД неодамна изјавија дека е рано да се заостри монетарната политика, и покрај зголемената инфлација, бидејќи пазарот на трудот сè уште не се опорави доволно од корона-кризата.
Инвеститорите исто така се претпазливи, со оглед на тоа дека сезоната на објавување на кварталните извештаи ќе започне наскоро.
Во анкетата на Reuters, аналитичарите проценуваат дека профитот на компаниите во индексот S&P 500 пораснал за 60 проценти во вториот квартал во споредба со истиот период минатата година.
Сите три најважни индекси се на пат да остварат добивка петти последователен квартал, благодарение на огромниот паричен и фискален стимул и економското закрепнување и заработката на компаниите.
Од почетокот на годината, индексот S&P 500 порасна скоро 14 проценти, додека Nasdaq и Dow Jones пораснаа за околу 12 и 11 проценти, соодветно.
И на европските берзи цените на акциите пораснаа вчера. Лондонскиот индекс FTSE зајакна 0,21 процент, на 7.087 поени, додека франкфуртскиот DAX порасна 0,88 проценти, на 15,690 поени, а парискиот CAC 0,14 проценти, на 6,567 поени.
