Газа, 16 мај 2021 (МИА) – Најмалку 40 лица загинаа, а 50 се повредени во израелските воздушни напади врз Појасот Газа денеска, соопштија здравствените власти во палестинската енклава.
Меѓу жртвите има 12 жени и осум деца. Меѓу повредените има десетици жени и деца.
Според телевизијата Ал Мајадин, 36 Палестинци биле убиени и речиси 60 повредени. Спасувачките екипи продолжуваат да ги расчистуваат остатоците од куќи уништени од ударите на главната улица во Газа, Ал Вахда, под кои може да има затрупани луѓе.
Ова е најкрвавиот напад од жестоките борби што избувнаа пред една недела помеѓу Израел и палестинските екстремисти на Појасот Газа, со кои управува исламистичкото движење Хамас.
Израелска армија: Соочени сме со највисока стапка на ракетни напади
Израел се соочи со највисок број на ракетни напади на своја територија за време на последното конфронтирање со палестинската исламистичка група Хамас, која ја контролира Газа, соопшти денеска армијата.
– Од понеделникот вооружените групи во Газа истрелаа околу 3.000 ракети кон Израел, надминувајќи го темпото за време на ескалацијата во 2019 година и за време на војната во 2006 година со либански Хезболах, изјави израелскиот генерал-мајор, Ори Гордин.
За време на ескалацијата во ноември 2019 година помеѓу армијата и групата Исламски џихад, во текот на три дена беа истрелани 570 ракети од Газа кон Израел.
И во војната во 2006 година со Хезболах, поддржан од Иран, вкупно 4.500 ракети беа истрелани кон Израел во текот на 19 дена, според податоците на Гордин.
На прашањето дали темпото од понеделникот е највисока стапка на ракетни напади на израелска територија, Гордин рече: „Не само што се согласувам, туку ова е и она што го презентирам“.
Ескалацијата што трае веќе една недела е предизвикана од немири во источниот дел на Ерусалим, присоединет од Израел, и според бројот на жртвите во густо населениот појас Газа се искачи на 181, и на 10 лица во Израел, според властите од двете страни
Состанок на Организацијата за исламска соработка
Организацијата за исламска соработка составена од 57 земји, итно се состана денеска во врска со конфликтот меѓу Израел и палестински Хамас во Појасот Газа.
На почетокот на состанокот министерот за надворешни работи Ријад Малки од Палестинската управа, која управува со палестинските области на окупираниот Западен брег, ги осуди, како што рече, израелските „кукавички напади“.
– Мораме да му кажеме на Алах дека ќе се спротивставиме до последниот ден, рече Малки, додавајќи дека Палестинците се соочуваат со долгорочна окупација, што е основа на проблемот.
– Злосторствата се извршени против Палестинците, рече Малки.
Палестинските власти, сепак, немаат контрола врз Хамас и Појасот Газа, каде милитантите ја презедоа власта во 2006 година.