Фудбалерите на Манчестер Јунајтед денеска ги започнуваат подготовките за новата сезона, а менаџерот на тимот, Ерик тен Хаг, веќе пристигнал во Манчестер и ги дал првите и конкретни упатства во клупскиот тренинг-центар.
Англиските медиуми пишуваат дека Тен Хаг меѓу другото дал конкретни инструкции во однос на тревната површина во клупскиот тренинг-центар и од персоналот побарал да ја скрати тревата на сите терени на точно 15 милиметри.
Понатаму се наведува дека овој стручњак верува дека таквата трева ќе им помогне на играчите да ја подобрат вештината на додавање, како и да ја забрзаат играта. Претходно тој најави дека многу ќе се фокусира на вежбите со топка, како и на физичката подготвеност на играчите.
Иако навивачите на „Црвените ѓаволи“ го поддржуваат Тен Хаг и првите идеи што ги донесе во клубот, тие се крајно незадоволни бидејќи раководството сè уште нема комплетирано ниту едно засилување, а јасно е дека им требаат минимум четири или пет докажани засилувања за да се вратат во борба за место во Лигата на шампионите.
Реално, тешко е да се зборува за шампионски амбиции, особено ако се знае дека Манчестер Сити и Ливерпул следната сезона ќе бидат уште посилни, а сигурно е дека Челси, Тотенхем, па дури и Арсенал дополнително ќе ја подобрат својата игра и квалитетот на настапите.
Медиумите шпекулираат дека Кристијано Роналдо би можел да го напушти Манчестер Јунајтед поради таквиот став на лидерот, но сигурно е дека ситуацијата значително би се променила доколку „Црвените ѓаволи“ успеат да го комплетираат трансферот на Френки де Јонг од Барселона, особено во време кога „разликата“ во бараната цена е само 10 милиони.
Неговото доаѓање, од друга страна, би покажало една комплетна друга страна на Манчестер Јунајтед.
