Американските медиуми објавија аудиоснимка од повикот во Брза помош по трагичниот инцидент што се случи за време на снимањето на филмот „Rust“.
Алек Болдвин работеше на снимањето на неговиот нов филм „Rust“ кога смртно ја застрела директорката на фотографија Халина Хачинс со „реквизит пиштол“ и го рани режисерот Џоел Соуза.
Објаснувајќи му на диспечерот на Брзата помош што се случило, Меми Мичел, супервизорот за снимање, вели:
„На ранчот Бонанца Крик имаме двајца случајно застрелани со реквизит додека снимавме филм. Ни треба помош веднаш“.
Диспечерот на Брзата помош прашува: „Дали се застрелани со вистински куршум?“.
На што Мичел одговара: „Не можам да ви го кажам тоа. Имаме двајца застрелани за време на снимање филм“.
Таа потоа објасни дека инцидентот се случил за време на проба за една сцена.
*Внимание! Содржината на снимката може да ве вознемири
Според Канцеларијата на шерифот во Санта Фе, Болдвин бил лицето кое го држело пиштолот во моментот на инцидентот.
Во соопштението на денот на несреќата, полицијата рече: „Канцеларијата на шерифот потврдува дека две лица биле застрелани за време на снимањето на „Rust“ - Халина Хачинс (42), директорка на фотографија и Џоел Соуза (48), режисер. Застрелани се откако продуцентот и актер Алек Болдвин (68) пукал со пиштол реквизит“.
Хачинс била пренесена со хеликоптер во болницата на Универзитетот во Ново Мексико, каде медицинскиот персонал ја констатирал смртта. Режисерот Соуза со возило на брзата помош бил пренесен во Регионалниот медицински центар Кристус Сент Винсент, каде му била укажана помош поради повредите.
Оваа истрага останува отворена, а уште не е покренато обвинение во врска со овој инцидент.
Американските медиуми пренесуваат дека на филмскиот сет имало големи проблеми и пред инцидентот.
