Обожавателите на видеоиграта Mortal Kombat конечно добија прв поглед на претстојното продолжение на филмската адаптација на популарната франшиза. Првиот филм се појави во кината во 2021 година и ги подели критичарите, но беше финансиски успех во кината.
Ексклузивни фотографии од сетот на Mortal Kombat 2, кој ќе се појави во кината на 24 октомври, открија неколку нови ликови, вклучувајќи го и омилениот меѓу фановите Џони Кејџ кој го игра Карл Урбан, познат по улогата во The Boys. Реакциите на фотографиите се главно позитивни.
„Смешно е како ова е подобро од MCU“, „Добар дизајн на костими и добар кастинг. Можеби видеоиграта од 90-тите конечно ќе ја добие адаптацијата што ја заслужува“, „Едвај чекам, не ни знаев дека направија продолжение“, „Ова треба да биде забавно“, се дел од коментарите на X.
Првиот филм заврши со најавата за доаѓањето на Џони Кејџ, познатиот и ексцентричен борец од видеоиграта. Ед Бун, еден од креаторите на видео играта Mortal Kombat, истакна дека филмот ќе ја истражи неговата приказна подетално, прикажувајќи го како поранешна холивудска ѕвезда фрлена во светот на крвавите борби. Додека Џони на Урбан ќе има свој печат, Бун мисли дека неговиот приказ ќе им се допадне на обожавателите бидејќи носи нов, посвеж пристап кон ликот.
За разлика од првиот филм, кој се фокусираше на подготовките за легендарниот турнир, продолжението конечно ќе се фокусира на вистинската битка помеѓу Earthrealm и Outworld. Влогот е голем - ако Земјата го загуби десеттиот последователен турнир, негативецот Шао Кан ќе ја преземе контролата над планетата. Според Бун, турнирот ќе има јасно видлив систем на бодување во текот на целиот филм, а ќе има и бројни изненадувања кои ќе ги држат гледачите во неизвесност.
Покрај Џони Кејџ на Урбан, потврдено е дека во филмот ќе се појави и Аделин Рудолф како Китана и Мартин Форд како Шао Кан.
Некои од ликовите од првиот филм кои се враќаат во продолжение се Лиу Канг (Луди Лин), Соња Блејд (Џесика Мекнеми) и Скорпион (Хиројуки Санада). Интересно е тоа што Џош Лосон и Макс Хуанг се исто така на списокот на актерите, иако ликовите што ги играа, Кано и Кунг Лао, починаа во последното продолжение. Бун навестува дека филмот ќе користи елементи од играта за да го објасни нивното враќање, што би можело да го вклучи духовниот свет и NetherRealm.
Режисерот Сајмон Меквојд најави дека вториот дел ќе биде уште поинтензивен, со повеќе борби, поразновидни локации и повпечатлива визуелност. Филмот ќе користи формат IMAX за дополнително да нагласи одредени сцени, а гледачите можат да очекуваат уште поспектакуларни секвенци на борби отколку во претходниот филм.
