Европската радиодифузна унија (EBU) вчера потврди дека 66-тото издание на Евросонг ќе се одржи во Палата Алпитур во Торино.
На официјалната Instagram страница на Евровизија беше објавено дека натпреварот ќе се одржи од 10 до 14 мај 2022 година.
„Со задоволство го најавуваме Торино како домаќин на следното издание на Евросонг, меѓународен фестивал сакан од голема публика во секоја земја. Изборот на RAI, заедно со EBU, не беше лесен поради солидните предлози од други градови, на кои им благодарам за нивното ентузијастичко учество. Денес, започнува возбудливо патување за RAI и Торино, кое ќе нѐ одведе до мај 2022 година. Тоа е голем предизвик за RAI и за нашата земја“, изјави извршниот директор на RAI, Карло Фуортес, за италијанските медиуми.
Торино ќе биде третиот италијански град што ќе биде домаќин на Евровизија, по Неапол (1965) и Рим (1991).
Патем, градовите што се натпреваруваа со Торино за домаќин на Евровизија беа Болоња, Милано, Пезаро, Римини.
Групата „Манескин“ победи на Евровизија оваа година и го донесе натпреварот во Италија.
