Македонската машка одбојкарска репрезентација со победа ги почна квалификациите за пласман на Европското првенство славејќи над Босна и Херцеговина во Скопје.
Пред празни трибини во салата „Борис Трајковски“ македонските одбојкари победија со 3:1 во отворањето од квалификациите. Иако планот беше да се забележи максимална победа од 3:0, сепак гостите успеаја да освојат еден сет.
Првиот сет беше најнеизвесен бидејќи отиде во продолженија каде Македонија сепак го освои со 27-25. Во вториот победивме со 25-21, а потоа во третиот Босанците се вратија во игра добивајќи го со 23-25. Во четвртиот Македонците ја заверија победата со 25-19.
Утре продолжуваат квалификациите на мини-турнирот во Скопје, но Македонија е слободна. Ќе играат Босна и Херцеговина против Турција од 18 часот, а задутре во истиот термин Македонија ќе се сретне со фаворитот Турција.
Првопласираната репрезентација ќе избори пласман на ЕУРО 2021, додека најдобрите пет второпласирани од сите групи исто така ќе патуваат на континенталниот собир.