Организаторите на Австралија опен, првиот тениски Грен слем турнир годинава, пред утрешната жрепка ги одредија носителите за турнирот кој стартува на 16 јануари, а тоа се Шпанецот Рафаел Надал и Полјакинката Ига Швјонтек.
Поради повреда турнирот во Мелбурн ќе го пропушти тенисерот број еден во светот, Шпанецот Карлос Алкарас, па статусот носител го презеде неговиот постар сонародник Рафаел Надал, кој лани ја освои титулата на овој турнир со победата против Даниил Медведев во финалето.
По Надал, втор носител е Норвежанецот Каспер Руд, потоа Гркот Стефанос Циципас, Србинот Новак Ѓоковиќ, Русинот Андреј Рубљов, Канаѓанецот Феликс Оже-Алјасим, Русинот Даниил Медвјдев, Американецот Тејлор Фриц, Данецот Холгер Руне и како десетти Полјакот Хуберт Хуркач.
Кај тенисерките зад Ига Швјонтек од Полска се Тунижанката Онс Жабер, Американката Џесика Пегула, Французинката Каролин Гарсиа, Белорусинката Арина Сабаленка, Гркинката Мариа Сакари, Американката Коко Гоф, Русинките Дарија Касаткина и Вероника Кудерметова, а десетта е Американката Медисон Кис.
Минатата година, сега веќе пензионираната Австралијка Ешли Барти ја освои титулата во Мелбурн.
Жрепката за Австралија опен ќе се одржи в четврток.