Денеска и официјално е донесена одлука дека новата сезона нема да почне од Франција, а од Ф1 излегоа со најава дека нивните надежите паѓаат на Австрија и 5 јули.
Организаторите на Големата награда на Франција денеска потврдија дека трката нема да се одржи оваа сезона. Трката на „Пол Рикар“ патеката во Ле Кастеле беше закажана за 28 јуни, но е дефинитивно откажана откако француските власти донесоа одлука да ги забранат сите големи настани закажани до средината на јули, а воедно и натаму ќе важат и рестрикциите за патувања со цел да се спречи ширењето на коронавирусот. Со ваквите мерки, јасно е дека трката не е можно да се одржи.
Француското ГП е десеттата трка која е откажана или одложена сезонава. Досега откажани беа и онаа во Австралија и Монако, но Австалијците најавија дека можно е да ја закажат за подоцна во годината. Останатите (Бахреин, Виетнам, Кина, Холандија, Шпанија, Азербејџан и Канада) се одложени без дефиниран датум.
По откажувањето на Французите од Ф1 излегоа со соопштение дека нивниот план е сезоната да почне со Големата награда на Австрија закажана за 5 јули.
„Целиме кон почеток на трките во Европа во јули, август и почетокот на септември со тоа што првата трка ќе се вози во Австрија викендот 3-5 јули. Септември, октомври и ноември ќе се вози во Евроазија, Азија и Америка, а сезоната ќе заврши во Заливот во декември со Бахреин пред традиционалното финале во Абу Даби, со што ќе комплетираме помеѓу 15 и 18 трки“, велат од Ф1.