Научници во Полска објавија откритие за првата бремена египетска мумија во светот чии посмртни останки се чуваат во Националниот музеј во Варшава.
Додека ја скенирале 2.000 години старата мумија полските археолози всушност откриле дека мумијата не е машки свештеник како што очекувале туку мумија на жена којашто била седум месеци бремена. Понатамошните анализи покажале дека фетусот не бил отстранет при процесот на мумифицирање. Жената била на возраст меѓу 20 и 30 години и била бремена 26 до 30 недели.
Мумијата во Полска е донесена во 19 век и е дел од збирката антиквитети на Универзитетот во Варшава. Истата се чува во Националниот музеј од 1917 година.
„Нашето прво изненадување беше што мумијата немаше пенис, туку гради и долга коса, а потоа откривме дека всушност станува збор за бремена жена. Првин го видовме малото стапало, а потоа и малото раче на фетусот, бевме шокирани“, вели археологот Марзена Озарек-Шилке.
Откритието е објавено во Journal od Archaeological Science. Првиот податок за идентитетот на мумијата е преку компјутерска томографија, додека 3D визуелното претставување открило долга виткана коса и гради на жена. Иако другите органи биле отстранети, фетусот бил недопрен.
„Не знаеме зошто фетусот не бил изваден од починатата жена во текот на мумифицирањето“, вели Војчек Ејсмонд, соработник на проектот. „Оваа мумија е навистина уникатна, немаме пронајдено ниту еден ваков сличен случај. Тоа значи дека нашата мумија е единствената во светот за која е утврдено дека е со фетус“, вели тој.
На основа на анализа според саркофагот, за мумијата првично се мислеше дека била на египетски свештеник кој живеел меѓу во првиот век пред новата ера и првиот век на новата ера. Научниците сега веруваат дека можеби мумијата е постара и ги истражуваат можните причини за смртта.