Научниците ја пронајдоа најголемата бактерија на светот во мочуриште во Гвадалупе - таа е во форма на бели влакна и со големина на човечка трепка.
Организмот наречен Thiomargarita magnifica е долг 1 сантиметар и е 50 пати поголем од другите големи бактерии. Ова е првата бактерија видлива со голо око. Тенки бели влакна беа пронајдени на површината на листовите од мангрови кои се распаѓаат во плитко тропско мочуриште.
Откритието е изненадувачко, бидејќи според моделите на клеточниот метаболизам бактериите не би требало да бидат толку големи. Бактеријата ја открил Оливје Грос, професор по морска биологија на Универзитетот Антилис во Гвадалупе. Се случило додека трагал по симбиотски бактерии во екосистемот на мангровите.
„Кога ги видов, си помислив: чудно“, рече Грос.
По внимателна проверка било откриено дека има чудна внатрешна структура. Додека кај повеќето бактерии ДНК слободно лебди во клетката, кај оваа бактерија ДНК е врзана за клеточната мембрана. Исто така, било откриено дека содржи трипати повеќе гени од повеќето бактерии, како и стотици илјади копии од геномот распространети низ секоја клетка, што ја прави невообичаено сложена.
На научниците не им е јасно како оваа бактерија станала толку голема. Една од можните причини за тоа е што на овој начин се приспособила да ги избегнува предаторите.
На други локации не се пронајдени такви бактерии. Откако истражувачите се вратиле на локацијата каде ја пронашле оваа бактерија, таа повеќе ја немало. Се претпоставува дека причината за нејзиното исчезнување е тоа што се работи за сезонски организам, пишува весникот The Guardian.
