Откриена е причината за смртта на легендарниот хрватски пејач Масимо Савиќ, кој почина вчера на 61 година.
Како што јави хрватската радио и телевизија HRT, Савиќ починал во Клиничкиот болнички центар Sestre milosdrnice во Загреб, каде се лекувал од рак на белите дробови.
Веста за неговата смрт ја потврдија неговата сопруга Ани и ќерката Мирна. Тие се простија од него со објава на Facebook.
„По кратка, но херојска борба, нè напушти нашиот татко, сопруг, гордост и љубов, Масимо Савиќ. Иако го напушти овој свет, вечно ќе живее во нашите души, насмеан, топол, силен, полн со љубов и исткаен од уметност. Ќе бидеме твоите девојки засекогаш. Ани и Мирна“, напишаа тие.
Од Масимо се простија неговите многубројни пријатели и колеги, меѓу кои: Тони Цетински, Нина Бадриќ, Халид Бешлиќ, Ана Руцнер, Златан Стипишиќ Џибони и многу други.
