Во товарно возило Mercedes 911 вчера на регионалниот пат Неготино-Градско, кај стариот мотел „Градско“, полициски службеници откриле 80 мигранти од кои 79 од Пакистан и еден од Еритреја.
– На 15 август 2020 во 9:30 часот на регионалниот пат Неготино-Градско, кај стариот мотел „Градско“, полициски службеници запреле товарно возило Mercedes 911, со скопски регистарски ознаки. Веднаш по застанувањето, возачот побегнал, но набргу бил пронајден и приведен. Станува збор за А.Ф. (20) од село Визбегово, скопско. При преглед во товарниот дел во возилото биле пронајдени 80 лица мигранти (79 од Пакистан и едно од Еритреја), соопштија од Министерството за внатрешни работи.
Од МВР информираа дека бил извршен увид од полициски екипи, а за настанот бил известен Јавен обвинител, по чија наредба против А.Ф. била поднесена кривична пријава, поради основи на сомневање за сторено кривично дело по член 418-б став 4 во врска со став 2 од Кривичниот законик. Исто така, по наредба на Јавниот обвинител мигрантите ќе бидат сместени во Прифатниот транзитен центар „Винојуг“ во Гевгелија.