Обвинител во Фудбалската федерација на Италија отвори истрага по коментарите на претседателот на Лацио, Клаудио Лотито, за последниот дуел што го одиграа Јувентус и Интер.
Лотито на 26 април за La Repubblica ја коментираше сезоната во Серија А што беше прекината поради пандемијата со коронавирусот.
„Само еден бод заостануваме зад Јувентус, а тоа е поради натпреварот Јувентус - Интер, кој, ајде ви се молам, сите го гледавте“, изјави тогаш Лотито.
Главна вест во италијанските спортски медиуми денеска е веста за истрагата што беше отворена поради содржината на оваа изјава, па обвинителството побара од Лотито да се изјасни што точно мислел со тоа.
Ако сугерирал дека има некаква неправилност, тогаш тоа треба да се истражи и објасни. А ако не е така, тогаш Лотито би можело да биде казнет за таквиот инсинуирачки коментар.
Јувентус го совлада Интер со 2:0 на натпреварот што се играше пред празни трибини во почетокот на март, откако неколку пати беше одложуван и поместуван поради пандемијата. Головите за Јувентус ги постигнаа Арон Ремзи и Пауло Дибала.
