Сите имаме омилен филм, омилен лик, омилен актер. Но кој филмски лик им е заеднички миленик на повеќето љубители на филмот?
Порталот Ranker, каде се водат рангирања по најазлични основи во филмската и ТВ уметност според мислењата на публиката, направи и ранг листа на омилени филмски ликови од сите жанрови заедно.
Според оваа листа, Форест Гамп е ликот за кој најмногу филмски обожаватели се изјасниле дека им е омилен, со 1,1 милиони гласови на онлајн анкетата на Ranker.com.
Истоимениот филм „Forest Gump“ (1994) е адаптација на романот на Винстон Грум од 1986 година, во режија на Роберт Земекис, со Том Хенкс во главната улога.
Филмот што освои шест Оскари се смета за еден од класиците на современата кинематографија, а улогата на Форест Гамп за едно од најдобрите стварувања во плодната кариера на Хенкс.
На второ место на ранг листата на Ranker се најде ликот на Вуди, каубоецот од анимираниот филм „Toy Story“, а на трето место е T-800, роботот што го играше Арнолд Шварценегер во „Terminator“.
Топ 5 го заокружуваат Дамблдор од франшизата „Harry Potter“ и R2D2 од легендарниот серијал „Star Wars“.