Долго најавуваниот камбек меч на две легенди во боксот, 54-годишниот Мајк Тајсон и 51-годишниот Рој Џонс Џуниор конечно ќе го гледаме утре.
Ова ќе биде егзибициски меч на двајца боксери во шестата деценија од животот, па борбата ќе се одржи според посебни, прилагодени правила, кои не беа исто дочекани од сите.
Ќе се одржат осум рунди од по 2, наместо вообичаените 3 минути, нема да има судии во рингот, а по борбата нема да биде прогласен победник. Од спортска перспектива, најбизарното правило за овој натпревар е дека нокаутите се забранети. Покрај тоа, ако на некој од боксерите му потече крв, натпреварот веднаш ќе биде прекинат.
„Ќе можат да ги покажат своите боксерски вештини, но не сакам да дадат сѐ од себе да се повредат. Ќе има солиден спаринг, но не треба да биде нокаут, не е борба за титула“, изјави Енди Фостер, извршен директор на Комисијата за спорт во Калифорнија.
Иако е човечки оправдано да се заштитат старите лица од сериозни повреди, многумина со право се разочарани од овие правила, особено кога се знае дека гледањето на преносот на овој натпревар во Америка за pay-per-view чини 50 долари.
„Не смеат да се нокаутираат?“, во неверување праша шефот на УФЦ, Дејна Вајт, кога го замолија да даде свои предвидувања за борбата.
Вајт прсна во смеа.
„Тешко е да се наметне тоа правило. Би сакал да се обложам дека тоа нема да се случи“, рече Вајт, кој важи за близок пријател на Тајсон и во минатото соработуваше со Џонс.
Вајт беше информиран дека борбата нема да биде ниту во понудата за обложување, бидејќи станува збор за егзибициски натпревар во кој нема да биде прогласен победник.
„Не го знаев тоа. Не знам што да кажам. Аман веќе“, заклучи Вајт.
Во јавноста протекоа и податоци за тоа колку секој од боксерите треба да заработи за оваа борба. Изворот за тоа е новинарот на ESPN Кевин Иоле. Тој на својот профил на Twitter објави дека Тајсон треба да заработи околу 10, а Џонс Џуниор околу 3 милиони долари.
Тајсон вети дека ќе ги донира сите приходи во добротворни цели, што би било една од најголемите донации на кој било спортист во современата историја. За време на својата кариера, Тајсон им помогнал на неколку здруженија кои првенствено се занимаваат со спречување на зависности кај младите и се грижат за децата од проблематични семејства.
