Нѐ очекува возбудлива сезона на филмски награди.
Вселенската бајка „Dune“, тинејџерската хроника со вкус на70-тите „Licorice Pizza“ и новата верзија на мјузиклот „West Side Story“, во режија на Стивен Спилберг, станаа фаворити за холивудските награди што ќе се доделуваат во наредните месеци, откако беа номинирани на различни избори од еснафот во филмската индустрија.
Сите три филма заработија номинации од здруженијата на режисери, продуценти и сценаристи, што ги прави надежни кандидати за најпрестижната награда - Оскар.
Доделувањето на златните статуетки годинава ќе биде во многу подоцен термин, откако беше одложено за 27 март, а Академијата за филмски уметности и науки ќе ги објави номинациите на 8 февруари.
Покрај гореспоменатите филмови, меѓу најголемите фаворити за Оскарите се уште два филма кои заработија неколку номинации од еснафот, а тоа се „Belfast“ и „The Power of the Dog“.
Експертите сметаат дека Американското здружение на режисери е многу сигурен показател за Оскарите, бидејќи победниците од нивниот избор во последните 18 години во 16 наврати освоиле златна статуетка.
Истите пет филмови беа номинирани и од режисери, и од продуценти
Овогодинешните кандидати за наградата на Американското здружение на режисери се Кенет Брана за „Belfast“, Џејн Кемпион за „The Power of the Dog“, Денис Вилнев за „Dune“, Пол Томас Андерсон за „Licorice Pizza“ и Стивен Спилберг за „West Side Story“.
Истите пет филмови беа номинирани вчера за наградата на Здружението на продуценти. Оваа награда е востановена во 1990 година, а оттогаш само еден оскаровец за најдобар филм остана без номинација во тој избор. Тоа беше „Braveheart“, кој доби Оскар во 1996 година.
Од филмовите кои често се споменуваат како потенцијални номинирани за Оскар, „Macbeth“ во режија на Џоел Коен и „House of Gucci“ во режија на Ридли Скот не се појавија на листата на номинирани.
За наградите на Здружението на сценаристи од споменатите филмови ќе се натпреваруваат „Dune“, „Licorice Pizza“ и „West Side Story“, додека „Belfast“ и „The Power of the Dog“ не можеше да бидат номинирани.