Рускиот претседател Владимир Путин неочекувано номинираше нов министер за одбрана, цивилот Андреј Белоусов, поранешен вицепремиер задолжен за економија, на местото на Сергеј Шојгу, соопшти во неделата Кремљ.
Шојгу, министер за одбрана од 2012 година и долгогодишен советник на Путин, ќе го замени досегашниот шеф на рускиот Совет за безбедност Николај Патрушев и ќе ја преземе одговорноста за воено-индустрискиот комплекс.
Овие последни промени во руското воено раководство предизвикаа низа реакции, но и шеги и шпекулации на социјалните мрежи.
Институтот за проучување на војната (ISW) претходно објави дека Путин одржал состанок со познат ривал на Шојгу како начин за евентуално намалување на моќта на министерот за одбрана.
„Ако војната одеше како што сака Путин, ова немаше да се случи. Пукнатините почнуваат да се појавуваат на фасадата“, објави на X, Бил Браудер, извршен директор на Hermitage Capital.
Политичкиот економист Константин Сонин изјави дека ова е „совршена претстава на теоријата на дегенерирана автократија“.
„Новите промени - Белоусов наместо Шојгу, а Шојгу наместо Патрушев во Советот за безбедност се совршена претстава на теоријата на дегенерираната автократија. Работите не одат според планот на Путин, но тој ќе ја ротира истата мала група лојалисти на неодредено време. Путин отсекогаш се плашел да донесе нови луѓе на позиции на моќ - дури и во најдобрите времиња, тие мораа да бидат лути без своја перспектива“, вели Сонин, додавајќи дека тоа станува се поочигледно како што се приближува крајот на владеењето на Путин.
Роб Ли, виш соработник во Институтот за надворешна политика за истражување (FPRI), напиша на X дека Патрушев е „големиот губитник“ во оваа реконструкција, пренесува Newsweek.
Овие промени доаѓаат во време кога руските сили постигнуваат „тактички значајни успеси“ во областите на североисточниот украински регион Харков.
„Руските сили спроведуваат релативно ограничени офанзивни операции долж руско-украинската граница во северниот дел на Харковската област и продолжија да остваруваат тактички значајни придобивки во веројатно помалку одбранетите области“, напиша ISW во саботата.
