Дали Град Скопје конечно ќе го реши проблемот со автомобилите кои ја нарушуваат пешачката зона на кејот покрај Вардар во самиот центар на градот?
Инспекторатот на Град Скопје синоќа од рано наутро почна акција за санкционирање на непрописно паркираните возила на јавната површина на кејот „13 Ноември“, на потегот од хотелот „Холидеј Ин“ до плоштадот „Македонија“.
„На овој потег се забележани поголем број несовесни возачи кои го злоупотребиле јавниот простор за да ги паркираат своите возила, иако на оваа локација паркирањето е забрането. Затекнатите прекршители се опоменати и им е изречена глоба. Досега се изречени 21 глоба“, велат од Град Скопје.
Во синоќешната акција беше вклучена и пајак службата која ги подигаше возилата чии сопственици не беа затекнати на местото.
„Во законски предвидениот рок од 7 дена прекршителите ќе треба да подигнат платен налог од Инспекторатот на Град Скопје и да извршат уплата од 50 евра, во денарска противвредност, колку што изнесува глобата за овој прекршок. За овој тип прекршоци, глобата не може да биде заменета со општокорисна работа“.
Акцијата за санкционирање непрописно паркирани возила на кејот „13 Ноември“ се спроведуваше во соработка со Општина Центар и од Град Скопје велат дека ќе трае континуирано, подолг временски период.
„Градот Скопје апелира до граѓаните своите возила да ги паркираат исклучиво на означените паркиралишта во градот, да го почитуваат комуналниот ред и поставената сигнализација и да ги чуваат јавните површини. Целта е да се одржува редот и хигиената на јавниот простор и да се стави крај на ваквите грди слики низ градот“.
Проблемот со кеј „13 Ноември“ е што токму Град Скопје дозволи улицата покрај кафе-баровите во самиот центар да биде проодна за автомобили. Во самиот ГТЦ има огромен паркинг каде можат да се паркираат, па редно е оваа улица да се затвори за сообраќај и целосно да им се отстапи на пешаците.
Фото: Град Скопје