Граѓаните ширум државава кои имаат стаклен отпад и сакаат да се ослободат од истиот ќе можат тоа да го направат на еколошки начин.
Пакомак започна акција со која од пред куќите и зградите на граѓаните ќе собира шишиња, тегли и друг вид на стакло кој потоа наместо во депонија ќе заврши за рециклирање.
„Амбалажниот отпад може да го пријавите на телефонскиот број 072 26 66 26 од понеделник до петок во период од 8:30 до 16:30 часот. Со јавување на телефонскиот број треба да ги оставите следните податоци: контакт број, лице за контакт, адреса на живеење, град, приближна количина на амбалажа за подигнување и начин на кој е спакувана амбалажата (кеси, гајби, вреќи...). Ние ќе Ве контактираме во рок од 10 дена за да ја преземеме амбалажата, а вие треба стаклената амбалажа (тегли, шишиња) да ја оставите пред вашата капија или влез доколку живеете во зграда (во домови, станови, дворови нема нашата екипа да влегува)“, известува Пакомак.
Акцијата важи за целата територија на Македонија, а граѓаните кои ќе решат на овој еколошки начин да се ослободат од својот стаклен отпад како благодарност од Пакомат ќе добијат пакетче ароматични семиња за расад за секои две гајби тегли и шишиња или 6 килограми стакло.
Ваквиот начин на исфрлање отпад е корисен бодејќи наместо да заврши во депониите, собраното стакло се изнесува надвор од државава и се носи во странски фабрики за рециклирање каде се топи и се преработува.