Пандемијата ќе биде под контрола за четири до осум недели ако сите почнат да носат маска  - веднаш

Носењето заштитна маска е еден од најефикасните начини за заштита од зараза со коронавирусот, заедно со одржувањето дистанца и честото миење раце.

Носењето маска или каква било покривка на лицето за носот и устата значително го намалува ризикот од зараза или пренесување на заразата.

Кога зборуваме, дури и носењето на еднослојна маска значително ја намалува количината на исфрлени капки. Во случај на кашлање и кивање, двослојната маска е поефикасна од еднослојната. Колку повеќе слоеви има маската, толку подобро.

Роберт Редфилд, директор на Центарот за контрола и превенција на болести на САД (CDC), смета дека пандемијата може да се стави под контрола во следните четири до осум недели само ако сите луѓе веднаш почнат да носат маски.

Неговиот коментар за Journal of the American Medical Association следи по објавувањето на научниот текст кој го напиша заедно со други експерти, во кој се нагласува дека има „повеќе од доволно докази“ за асимптоматско ширење на COVID-19 и дека најнови истражувања покажуваат дека носењето маска значително ја намалува заразата.

Изјавата на Редфилд следи во време кога носењето маска е препорака на CDC, но не е задолжително во сите сојузни држави.