Македонскиот капитен во интервју за грчки медиум откри интересни и досега непознати факти од неговата кариера.
Малку фалело кариерата на Горан Пандев да отиде во сосема поинаков правец. Уште кога бил во Беласица, грчкиот гигант Олимпијакос бил силно заинтересиран за него. На крај, како што знаеме, заврши во Интер во пакет со Ацо Стојков.
„Не знаев дека моето име е многу спомнувано во грчките медиуми. Ќе ви откривам дека кога бев млад, пред да заминам во Интер, бев многу блиску до трансфер во Олимпијакос. Но, претседателот на мојот тогашен клуб го прекина трансферот“, открива Пандев за грчкиот спортски портал Gazzetta.gr. Тогаш газда на струмичка Беласица беше легендарниот Бате Ване кој, од денешна гледна точка, воопшто не погрешил со одлуката да го стопира трансферот на Пандев кај јужниот сосед.
Потоа додава и дека грчкото првенство повторно станало актуелно за него кога пред неколку години имал понуда од солунски ПАОК.
„Пред неколку години се најдов себеси во преговори со ПАОК кој навистина многу ме посакуваше. Но, по толку години минати во Италија, моето семејство се чувствуваше добро тука и затоа решивме да останеме“.
Меѓу другото во тоа опширно интервју, неизбежно е и прашањето за политичките односи помеѓу двете држави. Но, Пандев политика не го интересира.
„Не знам ништо за политика, не разбирам ништо за политика и нема да зборувам за тоа. Јас сум човек кој сака фудбал. Ми се допаѓаат добри фудбалери, без разлика дали се од Италија, Грција или од Македонија. Никогаш не сум сакал политика. Она што го знам е дека станува збор за два народа кои се слични. Им посакувам на Грците, како и на моите сонародници, да ставиме крај на оваа пандемија и повторно да се најдеме заедно“, вели Пандев на темата грчко-македонските односи.
За жал македонскста репрезентација досега ниту еднаш се нема сретнато со грчката, па Пандев освен натпревари против грчки тимови во еврокуповите, нема играно против нивната репрезентација.